Istripuaren ondorioz ezker lepauztaian koskor bat eta bizikletari izugarrizko beldurra izatea gelditu zitzaidan. Hurrengo ia hogei urteetan ez nuen gurpildun bizikletarik hartuko eta, bizikleta zaharra etxeko ganbaran usteltzen zen bitartean, mendiarekin zerikusia zuten beste jarduera batzuei eman nien.
Anaia eta biok mendian korrikan eta mendi lasterketetan parte hartzen hasi ginenean, lagun batek noizik eta behin mendi bizikletan aritzea oso ona zela esan eta "zeharkako entrenamentuaren" kontzeptua lehen aldiz entzun genuen. Berak zihoenez, mendiko korrika saioak mendi bizikletarekin tartekatzea sasoi fisikoa mantentzeko oso ona zen, bide batez belaun eta horkatilak zainduz. 2015 urtean zehar Iker mendi-bizikleta erosi eta bizikletaren onuren inguruko kanpaina egin ondoren, azkenean, 2016ko martxoan, aitak bi semeei bizikleta bana oparitu zien.
"A zer nolako arriskua bizikletaren gainean berriro jarri nintzenean!" Lehen irteeretan ez nituen bi eskuak eskulekutik ezertarako askatzen, Loctite itsasgarriarekin lotuak banitu bezala. Ura edateko gelditu beharra nuen. Honetaz aparte, "kalapie"-a izan ordez zapatila pedalera erantsita gelditzen den sistema "modernoa" zutenez, oina lurrera botatzea ere izugarri kostatzen zitzaidan. Ez, ez nintzen batere eroso sentitzen eta, denbora osoan erortzearen mamua inguruan zebilenez, irteerak ez nituen gozatzen.
Lehen irteerak errepidean egin eta aldagailu eta pedaletako "sistema berriarekin" ohitzen hasi nintzenean errepidetik kanpo ibiltzen hasi ginen, Baliarraingo Ibiaur urtegi eta Lazkaomendi inguruko mendi-pistetan zehar ibilaldiak eginez. Iazko irteera nagusia Ullibarri-Gamboa urtegia inguratzen duen ibilbidea izan zen, ibilbide erraz, eroso eta gozatu nuen lehenengoa.
Orduz geroztik beste hainbat ibilbide egin ditugu eta, egiten ditugun ibilbideak teknikoki oso errazak direla ikusita, Ikerrek irteera hauei tartetxo bat blogean eskeintzeko ideiaz hitz egin zidan. Buruari hainbat buelta eman ondoren azkenean tartetxo hau mendi bizikletan egindako ibilbideei eskeintzea pentsatu dut, ea pixkanaka ibilbideak argitaratzen joaten naizen.

IBILBIDEAK
NAFARROA
- Bardeak: Tiraketa eremuari itzulia. 25 km, 2017/02/19.
- Andimendi: Lizarraga - Pilatos Balkoia - Lizarraga. 41,5 km. 2017/04/08
iruzkinik ez:
Argitaratu iruzkina