LUZE BERRIA ZIORDIAKO ARBARA EKIALDEKO "IRATI" BIDEAN. 2019/12/08

"Irati" bidearen oineko plakatxoa, urteen poderioz zahartzen hasia.


Abenduaren 8an, eguerditik aurrera euria botako zuela jakinda, eskalada azkar bat egiteko asmotan Asier eta biok Ziordiara hurbildu ginen. Honetarako "Irati" aukeratu genuen, Arbara ekialdeko biderik errazena. Bagenekien Antxon Gorrotxategi berak irekitako bideetan garbiketa eta txukuntze lanak egiten ari zela, baina luze berri bat topatzea ez genuen espero. Hau gutxi ez bada, luze berri honetatik gora beste luze bat irekiko ote denaren arrastoak ikusteak poztu gintuen. Irekiko al da? Nork daki...

"Irati" bideak, garbiketa lanetatik aparte aldaketarik ez du izan eta 2015ean irekitako luzeak modu berean eskalatu daitezke. Irekitako luze berria hirugarren bilgunetik gora hasten da.

BIDEAREN KROKIS "BERRIA"

Ibilbidearen nondik norakoak. Urdinez, luze berria eta bosgarren bilgunera arte egin genuen zeharkaldia.


Krokisa zehatzago.


DESKRIBAPENA

OHARRA: "Irati" bidearen ingurukoak kronika honetan azalduta daudenez, luze berrikoak ezik, bide osoaren nondik norako teknikorik ez ditut azalduko.

Nork esango zigun eguerdian euria botako zuela Ziordiako harrobitik irten ginenean. Zerua infinitura arte oskarbi zegoen, haizea baretsu eta tenperatura freskoa, eskalada goiza pasatzeko primerakoa.

Arbara ekialdeko horma egunsentiaren lehen argien eraginpean.


Aurretik eta atzetik inor ez genuela ikusita hurbilketa lasai hartu genuen, udazkenaren koloreekin gozatuz.

Udazken koloreak.


Materiala pazientziaz arnesetik zintzilikatu, inguruko hormei argazki batzuk egin eta, eguneko lehen eguzki izpiek goiko haitzak gorritzearekin batera eskalatzen hasi ginen.

Bidearen lehen metroetan.


- Notatzea bidea garbittu duela - esan zidan Asierrek lehen metroen ondoren - fisurak garbittuta dare ta soka berrin bateo beste daulare esango nuke.

Lehen bilgunean.


Bigarren luzean ere garbiketa lana nabaria zen, baita hirugarren luze itzelean ere, gure uste apalean bidearen luzerik ederrena.

Bigarren luzean.


Hirugarren bilgunean, atzean Ziordiako ezproi ikusgarria. "Irati" bidearen laugarren luzeak Asierren atzean ikusten den belarrezko erlaitz horizontala jarraitzen du harkaitz-plaka inklinatu batera arte.


- Hor goien kordino bat ta parabolt batzuk ikusteie.
- Etzun ba Gorrotxategik barianten bat irikiko? - Erantzun nion bilgunera iritsi nintzenean.
- Eztakit bat bañan hemendio gora dijola emateo.

Autobabeserako material nahiko eta soberan genuela ikusita eta ziurrenik ongi aseguratua izango zela pentsatuz, luzea eskalatzea erabaki genuen.

- Laugarren luze "berria", 40 metro, IV+. Eguberri egunean Olentzerok zer ekarri duen ohetik jaikitzen den haurraren kuriositate eta ilusio berberarekin eskalatzen hasi nintzen.

Lehen metroak harkaitz-plaka etzan bat eskuineko joerarekin eskalatu nituen, tartean harkaitz-zubi batetik pasatako kordel batean aseguratuz (III+).

Harkaitz-zubitik pasatako kordelaren parean.


Horma hemendik gora tentetu egiten da. Gainean dagoen harlauz nabarmenera zuzendu beharrean eskuinerako joerarekin eskalatzen jarraitu nuen, harkaitz-plaka tentean dagoen lehen paraboltera zuzenduz (IV). Tartean, harkaitz-zubi batean zinta-uztai bat pasatuz luzeko bigarren asegurua jarri nuen.

Paraboltera hurbiltzen ari nintzela beste bi ikusi nituen, bata bestetik oso gertu.

- Easngo nuke hemen paso zailen bat datorrela, paraboltak gertugi dare... - Bota nion Asierri badaezpada kontuz ibiltzeko esanez.

Lehen parabolta atzean utzita sabaitxo batera iritsi nintzen. Bertan jarritako beste bi paraboltak jarraituz, sabaia eskuin-ezker zeharkatu (IV) eta honen ezkerretik eskalatzen jarraitu nuen (IV) arrail bertikal batekin topo egin nuen arte. Parabolten arteko pasabideak oin eta eskuentzat helduleku ederrak ditu.

- Joer, ba paraboltak hain gertu eoteko etzait paso zaile iruittu - Bota nion arrailaren azpitik - igual bidea ez galtzeko jarriko zittun.

Arrailaren goiko zatian beste parabolt bat ikusi nuen. Goprutza luzatu eta bertatik express-zinta eta soka pasa ondoren, arrailaren oinera itzuli eta nondik eskalatu begiratzen hasi nintzen.

Arrail bertikala nondik eskalatu begiratzen.


Arrail honetan egindako garbiketa lana ere sekulakoa izan da. Eskuak baino oinak non jarriko nituen ongi aztertu ondoren gorputza altxatu eta arraila azpitik dirudiena baino errazago eskalatu nuen (IV+).

Arrail bertikala azpitik ikusita, paraboltaren kokalekua ikusi daiteke.


"Luzek hortio jarraitzen badu la ostia izangoa" pentsatu nuen arraila eskalatu ondoren parean ikusi nuen bigarren arrail bat ikusterakoan. Bertara hurbildu eta hau ere garbituta zegoela ikusterakoan izugarrizko poza hartu nuen.

Bigarren arraila ez da lehena bezain bertikala eta, heldulekuen aldetik behintzat, oso oparoa da. Ahal izan nuen punturik altuenean friend bat trabatu ondoren eskalatzen jarraitu nuen.

Heldulekuak nonahi topatuz eta metroak erraz irabaziz arrailaren amaierara nahi baino lehenago iritsi nintzen. Arrail honen eskalada itzela iruditu zitzaidan, pena luzeagoa ez izatea.

Arraila eskalatuta hormak inklinazioa galdu eta uztaidun bi paraboltez osatutako bilgunera arazorik gabe iritsi nintzen.

Laugarren luze berriaren bilgunea.


Laugarren luze berriaren bilgunea hirugarrenetik ikusita.


Hirugarren bilgunea laugarrenetik ikusita.


Bilgunea muntatu nuenean haizea aldatu eta zerua hodeiez estaltzen hasita zegoela konturatu nintzen. Beriain aldera begiratuz giroa iluntzen zihoala nabaria zen: "eztakit ba bidea busti gabe bukau behar deun...", pentsatu nuen.

Soka jasotzen ari nintzela gora begiratu eta rappel lerroko bigarren rappel puntura iristeko jarritako soka finkoa 10-15 metro eskasera ikusi nuen. Luzeak jarraipenik ez zuela iruditu zitzaidan.

Olazti eta Beriain pixkanaka iluntzen.


- Haure ona, ez?
- Asko gustau zait - erantzun zidan Asierrek bilgunera iritsitakoan - aurreko luzen antzekoa, kuarto mas edo...
- Neire kuarto mas ingurukoa iruittu zait, gehienez kinto, baña eztet uste.

Asier arrail bertikalaren oinean.


- Hortxe rappelak dare - esan nion soka finkoa seinalatuz - baña goitio eztiot luze honi kontinuidadeik ikusten.
- Logikona goitio bukatzea izan beharko zen - erantzun zidan Asierrek - deskuidauzkeo oaindio eztue largoik iriki.

Zer egin ez genekien; rappel lerrora ez genuen zuzendu nahi eta, eguraldia ziztu bizian aldatzen ari zenez, goitik zer topatuko genuen jakin gabe ezkerreko horma eskalatzen hasteak kezkatzen gintuen.

Ezkerrera begiratu eta belarrez estalitako erlaitz estu bat "Irati" bidearen seigarren luzeko harkaitz-plakara zuzentzen zela ikusi genuen.

- Beste bat da hortio jarraitu ta Iratiko azken largotatio ateatzea - proposatu zidan Asierrek.
- Bai, probau dezakeu - erantzun nion.

Asierri soberan nuen materiala ematearekin batera bilgunetik atera zen.

Zeharkaldiaren lehenengo metroak bete ondoren badaezpada friend bat trabatu eta aurrera jarraitu zuen.

- Hemen moztutako adar ta belarrak dare - esan zidan - bidea seguro hemendio dijola.

Zeharkaldiak zailtasun handirik ez duenez metroak erraztasun osoz irabazi zituen.

- Hemen bosgarren reunioa dau!!! -  Oihukatu zidan 20 metro inguruko zeharkaldiaren ondoren.

Zeharkaldiaren amaieran "Irati" bidearen bosgarren bilgunean. Argazkiaren goiko zatian, borobil gorri baten barruan, gero ikusiko genuen harkaitz-zubi batetik pasatako sokaren kokalekua adierazita dago.


Zeharkaldiaren erdialdean nengoela, Asierrek ikusitako adar eta belar moztuen parean hain zuzen ere, badaezpada gora begiratzen hasi nintzen adarrak goitik moztuak izango ote ziren jakin nahian.

- Goien soka bat puenterroka batetio pasata dau!!! - Bota zidan orduan Asierrek bilgunetik.

Zeharkaldia amaitu eta berak esandako lekura begiratu nuen. Zuhaixka batzuen adarren artean harkaitz-zubi handi batetik pasatako soka urdin bat zegoen.

- Gutxiñez badakigu goitio beste luze bat itteko asmoa daula - esan nion.
- Bai, ze logikaik etzeuken largo zuzen bat iriki gero trabesi bat itteko - erantzun zidan - logikona zuzen jarraitzea zen.

Harkaitz-zubitik pasatako sokaren kokalekua "Irati" bidearen bosgarren bilgunetik ikusita.


Luze berri hau eskalatu ala ez pentsatu ondoren, denborarik ez galtzeko "Irati" ohiko bidetik bukatzea erabaki genuen. Asierrek azken bi luzeak bakarrean eskalatzen zituen bitartean, begi bat heldulekuetan eta bestea eskuineko ezproian eraman zituen, ustezko bosgarren luze berrian parabolt edo bestelakorik ikusi nahian. Irabazten zuen metro bakoitzeko eguraldia pattaltzen eta tenperatura unetik unera geroz eta gehiago jaisten ari zen. Eskalatzen hasi nintzenerako eskuetako behatzak izoztuak eta zerutik tantaren bat erortzen hasita zegoen.

- Hara, hortxe kordino gorri bat!!! - Bota zidan bat batean bilgunetik.

Bilgunera iritsi baino lehen eskuinera bota eta harkaitz-zubi batetik pasatako kordel gorri bat ikusi nuen. Nahiz eta ongi begiratu ez nuen horma osoan besterik ikusi.

- Emateo hemendio beste largo bat ireki nahien dabiltzala - esan zidan.
- Eta ze ingodue Irati bitan banatu? Ze plaka hontako luzek earrak die.
- Eztakit - erantzun zidan - deskuidau ezkeo azpitio bigarren bide independientea irikitzeue.

Erantzunik gabeko galdera eta hausnarketa hauekin guztiekin trasteak jaso eta euri tantek kaskoetan sortutako "plik-plik-plik-plik" hotsen erritmoarekin kotxerako bidea bizi-bizi hartu genuen.

"Irati" "Y" baten moduan bitan banatuko da? Bigarren bide independiente bat irekiko da? Ez dakigu zer gertatuko den, baina ez dugu uste denbora asko pasako denik erantzunik izan gabe.

Arbara ekialdeko hormari azken begirada euripean...

RAPPEL LERROA ARBARAN EKIALDEKO HORMAN: HARROBIA ZEHARKATZEAREN AMAIERA?

Urteetan Ziordiako eskaladarik errepikatuena ezproia izan zen. Honen ondoan irekitako “Beutiful Luis” (250 m, 6b) eta “Zazpika” (200 m, 7c+), bideek ez zuten errepikapenetan eragin handirik izan, biak ala biak maila handiko eskalatzailea izatea eskatzen dutelako, jejeje.

Arbara ekialdean eskalada biderik ez zegoen. Antxon Gorrotxategik begirada eta imajinazioa bertara zuzendu zuen arte. 2015 eta 2018 urteen artean, bera tartean zegoela, “Irati” (220 m, 5a), “Birra Moretti” (210 m, 5c), “Rock Circus” (240 m, 5c+), “Marieta” (210 m, 5c) eta “Altzania” (235 m, V) bideak iritsi ziren.

Horma horretan bide gehiago irekitzerik uste ez genuenean Club Vasco de Camping-eko Rafa Elorza eta Sergio Martinek 2018-2019ko neguan “Pop Circus” (200 m, 6a+) bidea ireki berri dute eta momentu honetan “Sopa de perejil” proiektu berriarekin lanean ari dira, “Rock Circus” eta “Pop Circus” bideen eskuinetik joango dena.

Irekiera hauen guztien ondorioz, azkeneko lau urte hauetan Arbara ekialdean eskalatzaileen kopuruak gora egin du. Baina gorakada honek lanegunetan alde txarra ere izan du, oinezko jaitsiera harrobiaren erditik doanez, harrobiko langileekin eztabaida eta liskarrak sortu direlako. Hau dela eta, eskalada-bide hauetako kroniketan hemengo eskalada harrobia itxita dagoenerako mugatzea gomendatu izan da, harrobiko langileak lanean lasai utzi eta egiten diren leherketen arriskutik kanpo egoteko.

Arbara ekialdeko hormatik behera jaisteko rappel lerro bat muntatua egotea egokia izango zela pentsatu eta esaten genuenok asko ginen, baina, esaerak dion moduan, “esana da erraz eta egina garratz”. Eta urteetan honela izan da Rafa Elorza eta Sergio Martin esanetatik eginetara pasa ziren arte.

“Pop Circus” bidea irekitzearekin batera, Rafa eta Sergiok Arbara ekialdeko hormatik behera jaisteko rappel lerro bat muntatu dute. Eta hau gutxi ez bada, 60 edo 35 metroetako rappelak egiteko aukera dago. Rafak kudeatzen duen “viejas zapatillas” webgunean kontatzen duen moduan (kronika irakurtzeko hemen klik egin dezakezu), rappel lerroa muntatu aurretik Antxon Gorrotxategi (bertan proiekturik bazuen jakiteko) eta Irurtzungo Biaizpen ekipatzaile sutsua den Joseba Arlegikin hitz egin ondoren, azkeneko honek rappelak ekipatzeko Nafarroako mendi federakuntzaren materiala utzi zieten.

Rappel puntu guztiak uztaidun bi paraboltez muntatuak daude.

RAPPELEN KROKISA

Gorriz lehen rappela eta 60 metroetakoak, urdinez aldiz, 35 metroetara egiten diren rappelak. Zuriz, eskubanda eta orlegiz “Rock Circus” bidea.


Lehenengo rappela ”Pop Circus” bidearen laugarren bilgunea da eta “Irati” eta “Rock Circus” bideen artean kokatuta dago, mugarri handi baten ondoan. Hau gutxi ez bada, nahasketarik ez izateko “Rápel” hitza eta gezi bat ere harkaitz batean idatzita utzi dute.

Lehen r.appela kokatutako mugarriaren ondoan. harkaitzean "rápel" hitza irakurri daiteke.


Lehen rappelaren hasieran.


Lehen rappela 30 metro ingurukoa da, soka finko batez egindako 15 metro inguruko eskubanda batera iritsi arte.

Eskubandaren hasierara hurbiltzen.


Eskubandaren amaieran bigarren rappel puntura iritsiko gara, hau ere “Rápel” hitza margotua duena.

Eskubandaren azken zatian, lehen rappela ikusi daiteke.


Rafak esan zidanez, “Rápel” hitza idaztea “Rock Circus” bidearen bosgarren bilgunearekin ez nahasteko egin zuten. Lehenengo rappela 50 metro ingurura luzatuz bigarren rappel puntura iristeko aukera badago ere, sokak jasotzerakoan nonbaiten katigatuta gelditzeko arriskua handia izan daiteke, batez ere udaberriaren amaieran, landara, sasi eta zuhaixkak puri-purian daudenean.

Bigarren rappel puntua.


Bigarren rappeletik beherako rappelak 35 edo 60 metroetakoak egin daitezke.

Bigarren rappelaren hasieran.


35 metroetako rappelak egitea erabakitzen badugu, hirugarren rappel puntua “Rock Circus” bidearen laugarren luzearen erdian (5c+ luzera iristeko egiten den II zailtasuneko zeharkaldi horizontalean) topatuko dugu. “Rock Circus”-eko luze hau eskalatzerakoan kontutan izan, laugarren luzearen “benetako” bilgunea 10-12 metro eskuinerako baitago.

Hirugarren rappelaren kokalekua, “Rock Circus” laugarren luzearen erdian gutxi gora behera.


35 metroetako laugarren rappel puntua “Rock Circus” eta “Pop Circus” bideen arteko erlaitz eroso batean dago. Puntu honetara 60 metroetako lehen rappelarekin iritsiko gara. 60 metroetako bigarren rappela eginez, puntu honetatik beheraino iritsiko gara.

Laugarren rappel puntuan (rappelak 60 metroetara egiten baditugu hau hirugarren rappel puntua izango da).


Laugarren rappel puntua.


Bigarren rappelean.


35 metroetako bosgarren rappel puntua “Rock Circus” bidearen bigarren luzearen amaieran eskalatzen den tximiniaren gainean eta eskuinean gelditzen da eta denetatik hau da rappel punturik “deserosoena”. Argi ibili behar da “Rock Circus”-en bigarren luzea eskalatzerakoan rappel puntu hau luzearen berezko bigarren bilgunearekin ez nahasteko.

Hirugarren rappelaren (60 metroetara eginda) hasieran.


Gutxi gora behera bosgarren rappel puntuaren parean.


Azken rappelean. Gutxi gora behera bosgarren rappel puntuaren parean nago.


35 metroetako azken rappelarekin “Rock Circus” bidearen ezkerreko kanaleraino iritsiko gara. Kanalean harri txiki solte asko dago eta lurrera ez erortzeko kontu handiz jaitsi beharko dugu. 10-12 metro eskas ibili ondoren “Rock Circus” bidearen oinera iritsiko gara.

Kanalera iristen, eskuinean “Rock Circus” bidearen oina ikusi daiteke.


Kanalean, gutxi gora behera ni nagoen lekuan 60 metroetako rappela amaituko litzateke.


Rappelak nahiko tenteak eta garbiak direnez, lehenengoa ezik, beste guztiak hobe 60 metroetakoak egiten baditugu, azkarrago jaisteaz aparte, sokak katigatzeko aukera txikia dagoelako. Guk horrela egin genuen eta ez genuen inongo arazorik izan, hori bai, 60 metroetako bigarren rappel-arekin (kanalera iristen garenarekin) lurrera juxtu-juxtu iritsiko gara.

Rappel lerro honek oinezko jaitsiera ia erdira murriztera lortu dezaken arren, jaiegunetan, kontutan izanda horman hainbat soka egon daitezkeela eta harrobia itxita dagoela, egokiagoa izan daiteke oinez jaisten jarraitzea, batez ere “Rock Circus” edo “Pop Circus” bideetan sokadarik badago, sokada hauek arriskuan ez jartzeko.

Amaitzeko, Rafa eta Sergiori eskerrak ematea besterik ez daukat Arbaran ekialdeko horman egindako lan bikainagatik. Bejondeizuela!!!!

ZIORDIA, ARBARA EKIALDEA: "IRATI" BIDEA, 220 metro, 5a (2015/10/25)

OHARRA: 2019 urtean laugarren luze berri bat ireki zen bidea eskalatzeko bigarren aukera bat emanez. Luze berri honen inguruko informazioa kronika honetan topatu dezakezue.

Larunbatean Eginoko "Asezinak" bidea eskalatu ondoren iganderako Ziordiako ezproiaren eskuinean Antxon Gorrotxategik (oraingoan Garoa Unanueren laguntzarekin) ireki berri duen "Irati" bidea eskalatzeko gelditu ginen. Bide honen inguruko erreferentzi bakarra "Mendiak eta eskalada" blogeko argazki bat genuen. Larunbata gauean, afaldu ondoren ordenadorearen gelan sartu eta argazkia memorizatzeko asmoarekin ordenadorea piztu nuen. Badaezpada google bilatzailean "Irati Ziordia" hitzak jarri eta, a zer ezusteko atsegina!!!!! Juxtu bi ordu lehenago Xabier Larretxeak bere "eskalatzen" blogean Irati bidearen inguruko informazio eta krokisak argitaratuta zituela ikusi nuen (informazio hau ikusteko hemen klik egin). Bitan pentsatu gabe bere krokis eta azalpenak inprimatu eta igandean bidea informazio zabal eta fidagarriarekin eskalatuko genuenaren sentsazio atseginean ohera joan nintzen.

Tontakeri bat izan daiteke baina eskalada bide bateko informazio zabala eta zehaztua dudanean gauzak oso lasai hartzen ditut, bidearen zailtasuna jaitsiko balitz bezala jejeje. Igande goizean denborarekin jeiki, patxadan gosaldu eta Asier eta Iker bila etorri zitzaizkidanean, zoriontsu Xabierren krokis eta azalpenen kopiak eman nizkien: "tipo hau makina bat da" esan zidan Asierrek, "gañea emateo Antxon Gorrotxategin lagune dela, ze batek bidek iriki ta bestek publikatzeittu". "Ba bai" esan zuen Ikerrek "seguru ezautzeiela".

Kotxea martxan jarri eta Ziordiara zuzendu ginen.

BIDEAREN DATU BATZUK

Luzera: 220 metro.
Luzeak: 7.
Nork irekia: Antxon Gorrotxategi eta Garoa Unanue 2015ean.
Zailtasuna: 5a. Luzez-luze: 1ºL: 3c (35 m), 2ºL: 4c (40 m), 3ºL: 4c (40 m), 4ªL: II (30 m), 5ºL: 4b (20 m), 6ªL: 5a (40 m) eta 7ºL: 4b (15 m). Bosgarren eta seigarren luzeak batean egin daitezke bosgarren luzearen oinean dagoen harkaitz-zubian bilgunea egiten bada.
Orientazioa: Ekialdea, hala ere udan bero handia pasa daiteke. Honegatik ura eramatea gomendatzen dut.
Hurbilketa: kotxea uzten den lekutik 10-15 minutu.
Jaitsiera: 2019tik horma rappelatu daiteke. Rappelen inguruko informazioa hemen irakurri dezakezue. Rappelik egin nahi ez bada, bidea amaitzen den lekutik ekialdera doa jaitsiera, puntu gorri eta mugarriz adierazitako bidea jarraituz. Ziordiako harrobia erditik zeharkatzen denez, bigarren aukera hau harrobia itxita dagoenean bakarrik jarraitzea komeni da, hau da, jaiegunetan, bertako langileei lanean lasai utzi eta egiten diren leherketek duten arriskuagatik. Bidea amaitzen den lekutik kotxera 45 minutu inguru pasako ditugu lasai ibiliz gero.
Eramandako materiala: 60 metroetako bi soka, luzera ezberdinetako 12 express zinta (bosgarren eta seigarren luzeak batean egin nahi badira 15-16 bat express eraman), zintak bilguneetarako, hainbat zinta bidea babesteko (guk ez genituen asko erabili bidean dauden harkaitz-zubi gehienak soka edota kordinoekin aseguratuak daude eta), Walkie-talkie pare bat ere eramatea gomendagarria izan daiteke bilguneetan oihuka ez aritzeko eta amaitzeko alien semaforoa (baita grisa ere), Camalotak 0,5-2 artean eta Limcam gorri eta horia, baina hala ere bide osoan oso friend gutxi erabili genituen.
Bidea eskalatzeko pasatako denbora: 3 ordu izandako "ezustekoa" kontutan hartuta.

BIDEAREN KROKISA

Bidearen nondik norakoak, ikusten denez Ziordiako ezproi ikusgarriaren eskuinetik doa.


Krokisa zehatzago.


BIDEAREN OINERA IRISTEKO

Kotxea uzteko. Goian azaldu bezala bide hau eskalatzeko gomendagarriena jaiegunetan hurbiltzea da, harrobia itxita dagoela aprobetsatuz. Hala bada, kotxea harrobiaren sarreran dagoen hesiaren ondoan uzteko aukera izango dugu. Jaiegun batean joaterik ez badugu aldiz, kotxea Ziordian bertan edota errepidearen bazter batean uztea izango da gomendagarriena harrobitik irteten diren kamioei enbarazurik ez egiteko. Kontutan izan harginak lanean ari direla eta beraien lana errespetatu beharrean gaudela.

Harrobiaren sarreran kotxea uzteko. Gipuzkoa, Nafarroa nahiz Arabatik A-1 errepidea jarraitu 392 irteeran ("Ziordia") uzteko. Herrira iritsi aurretik ezkerrera harrobira doan errepidea dago. Bide hau hartzen badugu bidea mozten digun hesi bat topatuko dugu (harrobia irekita dagoenean hesi hau irekita egoten da). Hesi hau ekiditeko herrira sartu beharko dugu eta sartu bezain pronto ezkerrera egin herria pista hestu bat jarraituz uzteko. Metro batzuen ondoren hesia saihestu eta harrobiaren sarrerara iritsiko gara (hemen bigarren hesi bat dago). Kotxea hesiaren ondoan uzteko aukera izango dugu.

Argazki honetan kotxea uzten den lekuraino jarraitu beharreko bidea marraztu dut. Orlegiz marraztutakoa lanegunetan bakarrik jarraitzerik izango dugu jaiegunetan hesia itxita dago eta. Hesia saihesteko gorriz marraztutako bidea jarraitu beharko duzue.


Kotxea utzitako lekutik bidearen oinara iristeko. Harrobiko hesiaren ezkerrean "Acceso al Peñón" adierazten duen karteltxo bat dago. Karteltxo honi kasu eginez, bidexka bat hartu, harrobia inguratu eta pixkanaka Ziordiako ezproira hurbilduko gara.

Argazki honetan kotxea uzten den lekua ikusi daiteke (harrobiaren sarreran dagoen hesiaren ondoan). "Acceso al Peñón" adierazten duen karteltxoa ere gorriz adierazi dut.


Hesitik aurrera jarraitu beharreko bidea.


Hurbileketaren lehen metroetan, Ziordiako ezproia denbora osoa parean izango dugu.


Bideak harrobia eta ezkerrean dugun basoa inguratzen ditu.


Pista batera iristear gaudela "Aizpe" jartzen duen karteltxo bat ikusiko dugu (karteltxo hau landareengatik erdi-estalita dago). Hemen ezkerrera hartuko dugu pistara iritsiz.

"Aizpe" adierazten duen karteltxoaren parean, argazkian pista ikusi daiteke.


Hemendik aurrera pista jarraituko dugu. Lehenik eskuinera bihurgune bat hartu eta honen ondoren ezkerrera beste bat hartuko dugu pistaren amaierara arte.

Pistan, basoak udazken koloreak hartzen dituenean ikusgarri jazten da.


Argazki honetan lehen bihurgunea non dagoen adierazi dut.


Bigarren bihurgunea hartu ondoren. Pistaren amaiera ikusi daiteke.


Pista amaitzen den lekutik gora bidetik kanpo igoko gara, tarteka belarrei tiraka, eta harri askeak dituen maldatxo bat igo ondoren bidearen oinera iritsiko gara. Bideak bere oinean oraingoz ez dauka izena jartzen duen plakatxorik baina lehen metroetan harkaitz-zubi batetik pasatako kordino gorrixka bat ikusiko dugu.

Pista amaitzen den lekutik bidearen oinera egin beharreko bidea.


Lehen luzeko lehen metroetan harkaitz-zubi batetik pasatako soka gorrixka, bidearen oinean gaudela esango diguna.


Argazki honetan gorriz bidearen oineraino egin beharreko bidea eta orlegiz jaitsieran jarraitu beharrekoa marraztu ditut.


DESKRIBAPENA

Kotxetik atera eta parez-pare Ziordiako ezproia ikusi nuenean hotzikara batek gorputza goitik behera zeharkatu zidan: "Bufffff!!! A ze ikusmira" pentsatu nuen.

Kotxea uzten den lekutik ikusmira ikusgarri honetaz gozatzeko aukera izango dugu.


Trasteak kotxetik hartu ondoren, ttirri-ttarra eta arin-arin bizkarra izerdiz bustia bidearen oinera iritsi ginen: "metro batzuk gehio ta ia denbora eskatu beharrauket" esan zuen Ikerrek irrifartsu. Asierrek kotxea utzitako lekura begiratu eta "gutxiñez gaur bakarrik izango geala emateo". "Ba bai" erantzun nion "ze oain norbait etortzen bada, honea irixteako ia hirugarren luzen izangogea".

Bidearen oinean trasteak prestatzen.


Traste guztiak motxilatik atera eta zozketatxo batek bidea Ikerrek hasiko zuela erabaki zuen, bere atzetik Asier eta ni azkenik. Honela ba, Ikerrek traste guztiak zintzilikatu eta eskalatzen hasi zen.

Lehen luzea, 35 metro, 3c. Lehen metroetan plaka tente xamar bat eskalatzen da (III+). Pausu hau aseguratzeko harkaitz-zubi batetik pasatako soka gorrixka bat dugu (bidearen oinetik ikusten den berbera).

Bidearen lehen metroetan.


Luzeari zailtasuna ematen dion plakan, argazkian lehen asegurua jartzen den soka gorrixka ikusi daiteke.


Pausu honen ondoren ezkerrera zeharkalditxo bat egin eta diagonalean jarraituko dugu (hasieran kordinoz babestutako harkaitz-zubia) gure eskuinean belar eta zuhaixken kanal antzeko bat utziz. II mailako trepadatxoren bat tartekatuz inongo arazorik gabe bilgunera iritsiko gara (harkaitz zubi batetik pasatako altzairuzko kablea). IIko zeharkaldia erraza da baina badaezpada leku pare batean friend bana jartzea komeni da, badaezpada.

IIko zatian.


Lehen bilgunea muntatzen.


Lehen luzea zaila ez zela jakinda Iker konfidantzaz eskalatzen hasi zen. Plaka tentea eskalatu ondoren inongo zailtasunik gabe bilgunera iritsi zen.

Bitartean ni buruan ideia bat bueltaka nenbilen eta halako batean Asierrengana hurbildu nintzen: "Pentsatzen ai naiz ni hirugarren eskalatzen hasita hirugarren eta seigarren luzek nik ingo dittuala", "Bueno" erantzun zidan. "Joe ba eztau ondo!!!" Erantzun nion, "Larretxeak lau, bost eta seigarren luzek onenak diela esatebadu eztau ondo hoitatik nik bi ittea. Hobe da bakoitzak bat ittea denok disfrutatzeko" amaitu nuen.

Hizketan ari ginela Ikerrek igotzen hasteko esan zigun. Luzea erraz eskalatu genuen, estuasunik gabe. 3c-ko pasagunean oinak ongi jartzean dago gakoa eta ez genuen inongo estuasunik pasatu.

3c-ko plakan.


IIko zatia, bukaeran Iker lehen bilgunean.


Bilgunera iritsi ginenean Ikerri buruan nenbilen planen berri eman eta ongi iruditzen zitzaiola esan zuen. Modu honetan Ikerrek lehen, laugarren eta seigarren luzeak, Asierrek bigarren eta bosgarrena eta nik hirugarren eta zazpigarrena eskalatuko genituen.

Lehen bilgunea (harkaitz-zubi batetik pasatako altzairuzko kablea).


Lehen bilgunean.


Bigarren luzea, 40 metro, 4c. Bilgunetik gora doazen plaka bertikalak eskalatuko ditugu (denek helduleku onak dituzte baina aurreko luzearekin konparatuz zailtasuna handitzen doala somatuko dugu). Pausu zailenetan pausua babesteko paraboltak topatuko ditugu. Plaken arteko erlaitz txikietan harri txikiak daude eta behekoei botatzeko arriskua dago. Bilgunean uztaidun parabolt bat topatuko dugu harkaitz-zubi batetik pasatako soka batez babestua.

Asier, ohikoa duen moduan, lasai eta konfidantza isladatuz, luzeko plakak bata bestearen atzetik eskalatuz joan zen.

Luzearen lehen metroetan.


Nire ustez luzeak duen plakarik zailena eskalatu ondoren.


Lehen bilgunea eta bigarren luzea.


Luzea zuzen amaitu behar dela dirudienean eskuinera diagonalean metro batzuk egin eta bilgunera iritsi zen.

Eskuinera hartzen den lekuan (zeharkaldia gorriz margotu dut).


Ikerrek eta nik ere lasai eta eskaladaz gozatuz eskalatu genuen, bata besteari, eta inguruneari, argazkiak eginez.

Eskaladaz gozatzen.


Eskuinera eskalatzen den plaka azpitik ikusita.


"Ziordiako ezproia akojonantea da, eh?" Komentatu nien bilgunean geundela, "hortik eskalatzea ezinezkoa dela emateo". "Joer baietz" Ikerrek "Bertigoa ta dena emateo".

Ziordiako ezproiaren lehen zatia, benetan ikusgarria. Punta hortatik rapel motz bat egiten da eskaladarekin jarraitzeko.


Bigarren bilgunean.


Bigarren bilgunea, uztaidun parabolta eta harkaitz-zubi batetik pasatako soka.


Hirugarren luzea, 40 metro, 4c. Hirugarren luzeak helduleku oneko horma bertikala igotzen du. Hormara iristeko zailtasun eskaseko plakatxo batzuk eskalatzen dira eta hemen ere harriak botatzeko arriskua izan genezake. Zati hau nahiz eta erraza izan komeni da asegururen bat jartzea.

Plakatxoak eskalatzen, zati honetan asegururen bat jartzea komeni da.


Iker eta Asier bigarren bilgunean.


Horma bertikala harkaitz-zubietatik pasatako kordino eta paraboltetan express zintak pasatuz eskalatzen joango gara, beti ere helduleku onak topatuz eta tentsiorik pasa gabe.

Hormaren lehen metroetan.


Luzearen erdian gutxi gora behera. Benetan ederra da!!!


Bilgunera iristeko parabolt batez babestutako plaka bat dago (4c) eta eskuin-ezker eskalatu beharko dugu. Pausu hau estuasunik gabe egin ahal izateko oinak ahalik eta altuen jartzea komeni da, eskuentzat helduleku onak daude eta. Bilgunean uztaidun parabolt bat topatuko dugu harkaitz-zubi batetik pasatako soka batez babestua. Horma bertikalean harkaitz-zubietan orain jarrita dauden kordino eta sokek "osasuntsu" irauten duten bitartean ez dugu aparteko beste asegururik beharko.

Bilgunera iritsi aurreko pausuan.


Leku beretik behera egindako argazkia.


Azken plakatxoa eskalatzen.


Luze honetan benetan disfrutatu nuen, eta nahiz eta 40 metroetako luzea izan, motz egin zitzaidan. Bilgunera iristeko pausuan hasiera batean deseroso jarri nintzen, baina azkenean oinen kokalekua aldatu eta zailtasunik gabe eskalatu nuen.

Iker azken plakatxoan. Argazkian pausua babesten duen parabolta ikusi daiteke.


Hirugarren bilgunea.


"Ostia ze ona" esan zuen Ikerrek "Larretxeak arrazoia zun". "Ba bai" erantzun nion, "pena beste ehun metro ez izatea jejejeje".

Hirugarren bilgunean, uztaidun parabolta eta harkaitz-zubitik pasatako soka ikusi daitezke.


Laugarren luzea, 30 metro, II. Luze hau bilgunetik ezkerrera doazen puntu gorriak jarraituz oinez egingo dugu.

Bilgunetik ateratzen.


Trantsiziozko luzea da eta aparteko zailtasunik ez dauka.

Erraza izateagatik ez du esan nahi zeharkaldia ikusgarriak ez denik.


Dena den, nahiz eta luze erraza izan, komeni da tartean asegururen bat jartzea, bilgunera iritsi aurretik plakatxoren bat (II) eskalatu beharko dugu eta.

Bilgunera arteko zatia.


Asier hirugarren bilgunean amildegian zintzilik.


Bilgunea harkaitz-zubi batetik pasatako altzairuzko kable batez osatua dago.

Bilgunera iristen.


Bilgunea 5-6 metro gorago egin daiteke, orain harkaitz zubi batetik pasatuta dagoen soka batean, hurrengo bi luzeak bakarrean egin ahal izateko.

Bilgunetik gora egindako argazkia. Bilgune lekua gorago eginez bost eta seigarren luzeak batean eskalatzeko aukera izan genezake.


Ikerrek ez zuen aparteko zailtasunik pasa luze hau egiteko eta bilgunera arin-arin iritsi zen. Luze erraza izanda, argazkiak erosoago egiteko aprobetsatu genuen.

Bosgarren luzea, 20 metro, 4b. Bilgunetik orain arteko zeharkaldiarekin jarraituko dugu 5 metro inguruan plaka baten azpira iritsi arte (bertan harkaitz-zubi batetik pasatako soka topatuko dugu). Lehen esan bezala, puntu honetan bilgunea egiten badugu bost eta seigarren luzeak batean egiterik izango genuke.

Harkaitz-zubitik egindako argazkia. Bilgunea hemen egin ezkero hurrengo bi luzeak batean egitek aukera izango dugu.


Luze motz baina eder hau bi plakez osatua dago. Lehenengoa erditik eskalatzen badugu itsasgarritasunezko eskalada eginez eskalatuko dugu, luzeari duen baino zailtasun handiagoa emanez. Itsasgarritasunezko eskalada gustuko ez badugu ordea, plakaren ezkerretik errazago eskalatuko dugu.

Lehenengo plakan.


Erlaitz txiki baten ondoren bigarren plaka arrail bat eskalatuz eskalatzen da. Bilgunea bi paraboltez osatua dago.

Bi plaken arteko erlaitzean.


Bilgunea muntatzen.


Asierrek, lehen plakari zailtasuna bilatu asmoz, plakaren erditik eskalatu zuen bere konfidantza osoa oinetan ezarriz. Gu ez ginen gutxiago izan behar (jejejeje) eta bere pausuen atzetik, eta batez ere soka goitik izateak ematen duen lasaitasunarengatik, jarraitu genuen. Bigarren plakan eskalatzen den arrailean ere ederki gozatu genuen.

Lehenengo plakan.


Lehenengo plakako eskaladaren amaieran.


Luzea amaitzen.


"Luze politte, eh?" Esan nion Asierri bilgunera iritsi nintzenean. "Bai, baña motza" erantzun zidan tristura puntu batekin. Ikerri trasteak pasatu eta bideari zailtasuna ematen dion luzeari aurre egiteko prestatu zen: "Ze gradu dauke honek?" Galdetu zuen, "Teorin 5a baña gehienez 4c-n eskalatu daikela jartzeu" erantzun nion deskribapena irakurriz.

Bosgarren bilgunean. Bilgunea osatzen duten uztaidun bi paraboltak ikusi daitezke.


Seigarren luzea, 40 metro, 5a. Bideak duen luzerik gogorrena eta bideari zailtasuna ematen diona. Lehenengo metroak arrail eta plakatxoak eskalatuz eskalatuko ditugu ur-tantez osatutako plaka bertikalaren oinean dagoen erlaitzera arte. Zati honetan komeni da asegururen bat jartzea.

Arrail eta plakatxoak dauden tartean.


Ur tanten azpian dagoen erlaitzean.


Ur-tantez osatutako plaka hau da luzeari zailtasuna ematen diona eta lehenengo metroetan izerditxo batzuk botatzeko aukera izango dugu (behintzat ni bezalako erdipurdiko eskalatzaileek jejeje). Heldulekuak, nahiz eta txikiak izan, ez dira txarrak baina honelako hormetan eskalatzen gustuko ez baduzu (nire kasuan adibidez) edota behatzak "bigunak" badituzu, urduritasunik ez da faltako. Lehenengo metro bertikalak eskalatu ondoren zertxobait etzaten da eskalada erraztuz.

Ur tantetako eskaladaren hasieran, hemen daude zaitasunik handienak.


Zatirik zailena eskalatu ondoren.


Ur tanten amaieran.


Argazki bera bosgarren bilgunea ikusiz.


ur-tanten zatia amaitu ondoren helduleku oneko plaka bertikal bat eskalatuko dugu bilgunera iritsi arte. Bilgunea harkaitz-zubitik pasatako altzairuzko kable batez osatua dago.

Bilgunera iristeko eskalatu behar diren plaka bertikaleetan.


Seigarren bilgunean.


Seigarren bilgunea, harkaitz-zubi batetik pasatako altzairuzko kablea.


Nahiz eta zalantza eta urduritasun puntu batez irten Ikerrek luzea maisutasun handiz egin zuen. Asier eta biok igotzear geundela Asierri begiratu eta "ein dezakeuna da gotera arte banaka eskalatu eta gotera ere banaka egin bata bestei enbarazuik ez itteko" esan nion. "Konforme!!!" Erantzun zidan.

Ur tanten azpiko erlaitzera iritsi eta Asierri argazkiak egiten aritu nintzen.

Ur tanten azpiko erlaitzera iristen.


"Goterak gorrotoittut" esan nion nire ondora iritsi zenean "sekula eztittut ondo eskalatzen ta gañea nere erizain behatzekin eztet ondo pasatzen". Egia esan ez dakit hau Asierri edo nire buruari esaten ari nintzen. Arnasa sakon hartuz, hormari pixkanaka metroak irabazten hasi nintzen urduritasunez betea. Metroak irabazi ahala, dena ongi zihoala ikusita lasaitzen joan nintzen eta onartu beharra daukat azkenean zertxobait ere disfrutatu nuela jejeje.

Ur tantetako eskaladaz "gozatzen" jejeje.


Eta bat-batean eguneko ezustekoa gertatu zen. Arnesetik zintzilik neraman express zinta batek bizitzatik nazkatuta zegoela erabaki eta bere buruaz beste egin zuen arnesetik askatu eta bosgarren luzearen oinara iritsi arte. "Joer, ostiaaa!!!!" Bat bota nuen. Hasiera batean expressa pakean uztea pentsatu genuen baina azkenean, denboraz ongi gindoazela ikusita, ni nengoen lekuan harkaitz zubi batean aseguratu (Ikerrek nire soka aske uzteko) eta Ikerrek Asier bosgarren luzearen oinaraino jaitsi zuen. "Gutxiñez hola badakigu bi luzek enpalmau daizkela, jejeje" esan nion Ikerri.

Asierrek expressa erreskatatu eta bi luzeak berriro ere eskalatu zituen. "Eske bosgarren luzea indezunen triste xamar ikusi zaittut ta nahita botaet sikiera bi luze gehio eskalatzeko" esan nion irrifartsu. "Hori da" erantzun zidan irrifartsu "zuk beti bestetan pentsatzen".

Expressa erreskatau ondoren bosgarren luzearen hasieran. Asier txiki ikusten da ingurunearen handitasunean.


Ur tanten zatia amaitzen.


Seigarren bilgunera iristen.


Asier bilguneraino eskalatu eta bere atzetik ni ere iritsi nintzen: "Bueno hau ia bukau deu" esan zuen Ikerrek. "Gauzak ikusita bazpare paretatik aterarte eztet esango, jejejeje" erantzun nion.

Ni ere bilgunera iristen.


Zazpigarren luzea, 15 metro, 4b. Azken luzea nahiz eta motza izan hiru eskalada mota egiteko aukera izango dugu.

Lehen zatian harmaila erraz batzuk eskalatuko ditugu.

Lehen zatiko harmailak eskalatzen.


Harmailak eskalatu ondoren plaka tente bat eskalatuko dugu.

Asier eta Iker seigarren bilgunean plakaren azpitik ikusita.


Plaka tentea eskalatzen.


Amaitzeko diedro bat eskalatuko dugu (4b). Bilgunea diedroaren amaieran dago eta harkaitz-zubi batetik pasatako altzairuzko kable batez osatua dago.

Diedroaren amaieran.


Zazpigarren bilgunea muntatu eta gero.


Luze honek metro gehiago ez izatearen penarekin ere gelditu nintzen ederki disfrutatu nuen eta. Eskaladari ahalik eta zukurik gehiena atera asmoz bilgunea lasaitasun handiz muntatu, postura eroso batean jarri eta Iker eta Asier aseguratu nituen tarteka argazkiak eginez.

Seigarren bilgunea zazpigarrenetik ikusita.
<

Iker Irati bidea amaitzen.


"Ona bidea, eh?" Galdetu nien bidea amaitu genuenean. "Ba, bai" Ikerrek "Gorrotxategin beste bideekin konparauta hemen gehio eskalatu ta gutxigo ibiltzea".

Bi anaiak zazpigarren bilgunean.


Traste guztiak jaso, eskalada txokolatezko barratxo batzuekin ospatu eta beherako bidea hartu genuen.

Bidearen amaieran, hau da gozamena!!!!


Jaisteko mendiaren ertza jarraitu genuen harrobiaren norabidearekin. Hasiera batean erdi izkutatutako bidexka ez da oso garbia baina pixkanaka han-hemenka mugarriren bat ikusi daiteke. Gainera puntu batetik aurrera bidean mugarrietatik aparte puntu gorriak ere ikusiko ditugu harrobiara iritsi arte.

Behin harrobira iritsi ginenean zeharkatzen duen pista jarraitu genuen pixkanaka igoeran jarraitutako pistarekin bat egin arte. Hemendik aurrera igoeran jarraitutako bide bera jarraitu genuen. Guztira, bidearen amaieratik kotxera 50 minutu pasa genituen.

Bidean Ziordiako ezproitik harrobiraino doan horman eskalada bide ezberdinak imajinatuz joan ginen, horma argazkiekin "metrailatuz". "Hemen oaindio badau ze iriki" esan zuen Asierrek bururatzen zitzaizkion bide ezberdinak deskribatuz. "Bakizu" erantzun nion, "datorren udan egun pasa etorri ta ea bide berri bat irikitzeko kapaz gean". "Ona izango zan guk bide berri bat irikitzea" esan zuen Ikerrek "Joe baietz" erantzun zion Asierrek, "gañea jendek gure nibeleko bideik irikitzeko ohitturaik eztauke". "Ba pena da ze behin Desnivelen irakurri nun eskalatzallen %85a IV-V zaitasunen ibiltzen diela" erantzun nien.

Bide berri bat irekitzeko ametsetan kotxera iritsi, trasteak jaso eta beste hainbat argazki egin ondoren paraje zoragarri honi azken begirada bota eta etxerako bidea hartu genuen.

Hormari azken begirada, ziur itzuliko garela.