LUZE BERRIAK ETA ALDAKETAK ZIORDIAKO ARBARA EKIALDEKO "BIRRA MORETTI" BIDEAN. 2019/12/25

Bizitza zoragarria da. Abenduaren hasieran Ziordiako "Irati" bidean Antxon Gorrotxategik irekitako luze berriaren berri eman nuenetik, bi gertakari gertatu dira: batetik, Club Vasco de Camping Elkartearen "Errimaia" aldizkarian Ziordiako eskalada bideen inguruko kronika zehatza argitaratu da, non, "Irati"-ren luze berriaz gain, "Birra Moretti"-n egindako aldaketen berri ere eman den. Bestetik, duela egun batzuk Antxon Gorrotxategiren mezu bat jaso nuen, non "Birra Moretti"-n egindako aldaketen berri eman zidan. Biak ala biak Olentzeroko opari ederrak izan dira. Milesker!!

Askotan esan badut ere, ez legoke gaizki berriro ere esatea. Egino eta Ziordian Antxon Gorrotxategik egindako, eta egiten duen, lan altruista itzela da. Eta ez bide berriak ireki dituelako bakarrik, bide hauek guztiak garbitu eta hobetzeko egiten dituen lanarengatik ere. Eta hau guztia gu bezalakoen gozamenerako, ordainean ezer jaso gabe.

Ez dakit bide bat ireki, ekipatu eta mantentzeak duen lan mardulaz jabetzen garen. Eta hau gutxi ez bada, beste batzuen lan honi egindako kritikak entzun ohi dira gainera. Bide hauen guztien ekipatzaileek gure miresmen eta esker onik handiena izan beharko luketeela uste dut. Milesker bihotz-bihotzez!!!

"Birra Moretti", duela lau urte Ziordiako Arbara ekialdean eskalatu genuen bigarren bidea izan zen, 2015eko abenduaren 20an, hain zuen ere. Orduan Asier soka-lagun izan nuenez, ilusio handia egin dit bide hau berriro ere berarekin sokada osatuz errepikatzea.

Aurreratu beharra daukat bidea errepikatu badugu ere, guretzat bide berri bat eskalatzea bezalakoa izan dela, irekitako luze eta pasarte berriak ez ezik, lehendik eskalatutakoak erdi ahaztuak genituelako. Dena den, kronika honetan luze eta aldaketa berriak bakarrik izango dira zehaztasunez azalduko ditudanak, bidearen ingurukoak dagoneko hemen azalduak ditudalako.

BIDEAREN DATU BATZUK (ALDAKETAK KONTUTAN HARTUTA)

- Luzera: 200 metro.
- Luzeak: 6.
- Nork irekia: Antxon Gorrotxategi eta Garoa Unanue 2015eko azaroan. Aldaketak Antxon Gorrotxategik 2019an eginak ditu.
- Zailtasuna: V+. Luzez-luze: 1ºL: IV+ (45 m), 2ºL: 5b (35 m), 3ºL: V+ (35 m), 4ºL: V (45 m), 5ºL: III (5 m) eta 6ºL: IV+ (30 m).
- Orientazioa: Ekialdea.
- Ura: Ziordia herriko iturrian hartu daiteke.
- Hurbilketa: kotxea uzten den lekutik 15-20 minutu.
- Jaitsiera: 2019tik horma rappelatu daiteke. Rappelen inguruko informazioa hemen irakurri dezakezue. Rappelik egin nahi ez bada, bidea amaitzen den lekutik ekialdera doa jaitsiera, puntu gorri eta mugarriz adierazitako bidea jarraituz. Ziordiako harrobia erditik zeharkatzen denez, bigarren aukera hau harrobia itxita dagoenean bakarrik jarraitzea komeni da, hau da, jaiegunetan, bertako langileei lanean lasai utzi eta egiten diren leherketek duten arriskuagatik. Bidea amaitzen den lekutik kotxera iristeko 45 minutu inguru pasako ditugu lasai ibiliz gero.
- Eramandako materiala: 50 metroetako soka bakarra, luzera ezberdinetako 12 express zinta, zinta-uztaiak bilguneetarako eta Alien, Link cam eta artaka-trabagailu jokua. Bide osoan Link Cam horia bakarrik erabili genuen. Walkie-talkie pare bat eramatea ere gomendagarria izan daiteke bilguneen artean oihuka ez aritzeko.
- Eskalada-bidea eskalatzeko pasatako denbora: Bi ordu eta erdi.

BIDEAREN KROKISA

Ibilbidearen nondik norakoak. Gorriz, "Birra Moretti" ireki zeneko ibilbide originala, urdinez aldiz, egindako aldaketa guztiak.


Krokisa zehatzago.


DESKRIBAPENA

Eguberri eguna hotz esnatu zen. Behe-lainoak, kotxearen ihes-hoditik irtendako ke itxiaren moduan, bazterrak ezkutatzen zituen. Kotxean irabazitako kilometro bakoitzero egunsentiak gradu bat galtzen zuen, Altsasun pare bat gradu eskasera iritsi zen arte. Ziordia atzean utzi ondoren, harrobiko bidean, bat batean behe-lainoa desegin eta, irla baten moduan, Arbara ekialdeko horma bere osotasunean azaldu zen.

- Momentu baten beste nunbaittea juteko esatekotan aittu naiz - esan zidan Asierrek motxila hartzen nuen bitartean. Ziordian ni ere oso optimista ez nintzela onartu beharra daukat. Baina horma bere osotasunean ikusteak alaitu ninduen.

- Esperoet harkaitze sekoa eotea - erantzun nion, behe-lainoak berriro ere estaltzen gintuen momentu berean.

Beriain, baso eta hodeien gainetik.


"Birra Moretti"-ren lehen luzearen ezkerrean dagoen zuhaixka nabarmena identifikatu ondoren, bidearen oinera zuzendu ginen. Lehen luze berria bidearen oinaren ezkerrean dago, 15 metro ingurura, gutxi gora behera. Luzearen hasieran parabolt berri eta distiratsu bat topatuko dugu.

"Birra Moretti" bide originalaren oineko plakatxoa.


Luze berriaren oinera iritsi ginenean hotzik ez genuen. Horma behatzekin ukitu eta hotza ez zegoela ikusi genuen.

- Inbertsio termikoa eongoa - esan zidan Asierrek,
- Hala izangoa - erantzun nion - dudatan nau polarrakin eskalau edo ez. Badaezpada polarrik ez kentzea erabaki nuen.

Material guztia arnesaren uztaietan banatu, katu-oinak lurrez ez zikintzeko kontu handiz jantzi eta, walkie-talkie-ak piztu ondoren, eskalatzen hasi nintzen.

- Lehen luzea, 45 metro, IV+. Luzea harkaitz-plaka bertikala bat eskalatuz hasten da, tentea izan arren, helduleku paregabeak dituena. Metroak modu arinean irabazi nituen eta, konturatu nintzenerako, luzearen oinetik ikusten den zuhaixka nabarmenaren ondoan nengoen (IV).

Zuhaixka nabarmenaren parean.


Zuhaixkatik gora horma gehiago tentetzen da, baina heldulekuak onak izaten jarraitzen dute. 5-6 metro bertikal eskalatu ondoren erlaitz eroso batera iritsi nintzen (IV+). Orain arte eskalatutako metroetan aseguruen arteko tartea laburra ez bada ere, aseguruen artean erraz eskalatzen zela iruditu zitzaidan. Dena den, horma osoan friend edota artaka-trabagailuak trabatzeko aukera handiak daude.

- Oain arte politte!! - bota nion Asierri erlaitzetik - kristoneko heldulekuk dare.

"Oain arte politte!!" bota nion Asierri erlaitzetik.


Erlaitzaren gainean.


Erlaitzetik gora begiratu eta horma inklinatzen zela ikusi nuen. Parabolt bakar bat jarrita dagoela ikusita, zailtasunik handienak atzean utzita nituela pentsatu nuen. Bitan pentsatu gabe aurrera jarraitu eta horma inklinatua eskalatu nuen (IV).

Horma inklinatua erlaitzetik ikusita. Argazkian horma babesten duen parabolta ikusi daiteke.


Horma inklinatua eskalatuta, II/III zailtasuneko hormatxo erraz batzuk eskalatuz jarraitu nuen, "Birra Moretti"-ren lehen bilgune "ofiziala" muntatuta dagoen zuhaitzera iritsiz.

"Birra Moretti"-ren lehen bilgune "ofiziala".


Bilgunea muntatuta dagoen zuhaitza atzean utzita, muntatutako bilgune berria topatu nahian, belar eta askatutako harrien gainetik maldan gora oinez jarraitu nuen. Atzean dagoen horma goitik behera begiratu arren ez nuen parabolt, kordel edo bestelako asegururik ikusten. Bitartean, horma urre kolorez janzten hasi zen. Eta eguzkiaren lehen izpiei eskerrak, ez zen denbora luzerik pasa hormaren ezkerraldean parabolt bat distiratzen hasi zen arte. Bitan pentsatu gabe bertara zuzendu eta hormaren oinean harkaitz-zubi batetik pasatako kordel horia topatu nuen. Kordelaren ondoko arrail batean artaka-trabagailu bat trabatuz bilgunea indartu nuen.

- Reunion!! - bota nion Asierri talkie-tik.

Lehen bilgunea. Borobil gorriaren barruan bilgunea indartzeko trabatutako artaka-trabagailua ikusi daiteke.


- Joer, kostazait reunioa topatzea - esan nion Asierri zuhaitzen artetik azaldu zenean. - ez nun uste hain ezkerrean zeonik.

Lehen luze berri hau ederra iruditu zitzaigun eta, gure ustez, lehen luze "ofizialak" baino jarraitutasun handiagoa dauka, denbora osoan IV zailtasunaren baitan mantenduz. Antxonek emandako azalpenak irakurri ondoren, Asierrek bigarren luzea eskalatzen jarraitu zuen.

- Bigarren luzea, 35 metro, 5b. Lehen parabolta urrun badago ere, Asier bertaraino erraz iritsi zen (IV). Bertan jarritako lehen express-zintatik soka pasatuz aurretik zuena aztertzen hasi zen.

- Zemuz ikustezu?
- Eztu zaile ematen baña harkaitzek eztit konfiantza haundik ematen - erantzun zidan.

Eta ez zitzaion arrazoirik falta. Lehen 10-15 metroetan hiru parabolt jarrita egon arren, harriaren kalitatea ez zirudien ona. Oinak helduleku ezberdinetan kontu handiarekin jarriz, metro pare bat irabazi eta bigarren paraboltera iritsi zen.

Bigarren paraboltetik aseguratu ondoren.


Hirugarren parabolteraino ere, zuhurtzia oso eta kontu handiarekin eskalatu zuen, edozein momentuan esku nahiz oinetako heldulekua askatuko zenaren beldur izango balitz bezala. Paraboltera iristearekin batera horma bertikala eskalatu zuen (5b).

Hirugarren paraboltaren parean.


Asierri gertatu bezala, niri ere hasiera batean horma bertikalaren harria zalantzazkoa iruditu zitzaidan. Hala ere, metroak irabazi ahala, heldulekuak diruditenak baino sendoagoak direla baieztatu nuen, hasiera batean uste nuena baino gutxiago estutuz.

Horma bertikala eskalatuta, helduleku ederrak dituen harkaitz-plaka inklinatu bat zuzen eskalatzen jarraitzen da (IV+), ezkerrera doan zeharkaldi batera iritsi arte. Horma bertikalaren harkaitza zalantzazko itsura duen arren, harkaitz-plaka trinkoa da.

Horma bertikala eskalatu ondoren, harkaitz-plaka inklinatuaren lehen metroetan. Azpian "Birra Moretti"-ren lehen bilgunea muntatzen den zuhaitza ikusi daiteke (guk oraingoan nire azpiko hormaren oinean muntatu genuen), baita bigarren bilgunera iritsi aurreko zeharkaldia ere.


Ezkerrera doan zeharkaldiaren hasieran egindako argazkia. Asier bigarren bilgunean ikusi daiteke, "Birra Moretti"-ren berezko hirugarrena.


Zeharkaldiak lehen metroetan zailtasun handirik ez dauka eta, oinak non jarri ongi begiratuz, metroak erraz irabazi nituen (IV+).

Zeharkaldiaren hasieran, azpian harrobia behe-lainoak estalita.


- Oain beste pasito bat izangozu - esan zidan Asierrek bilgunetik, zeharkaldiaren amaierara iristear nengoela.

Berak esan bezala, zeharkaldiaren amaieran ezkerreko noranzkoan eskalatuz pasa beharreko pasabidea dago. Zutik nengoen harlauza txikian oinen kokalekua aldatu eta, ezker besoa luzatuz, ezkerreko hormara iritsi nintzen, pasabidea besotik tira eginda eskalatuz (V). Pasabide hau atzean utzita bilgunearen eskuinetik behera doan kanal nabarmena zeharkatu eta, harkaitz-plaka tente bat eskalatuz (IV+) bilgunera iritsi nintzen.

Kanala zeharkatzen.


- Luze politte, ez?
- Bai - erantzun zidan -  pena hasierako paretako harrie.
- Emateuna baño hobea da.
- Bai, baña halere repetizio batzuk behar dittula ustet.

Behe-lainoak bazterrak hartuak.


- Hirugarren luzea, 35 metro, V+. Antxonek pasatako informazioa irakurri eta, luze honek aldaketarik ez zuela ikusi ondoren, eskalatzen jarraitu nuen.

Luze honetan aldaketak egin ez denez, honen inguruko azalpen zehatzik ez dut emango. Honetarako hemen klik egin dezakezue.

Ez dakit aurretik nindoalako edo, baina luzea oso lasai eskalatu nuen, estutasunik pasa gabe, pasabide eta mugimendu bakoitza gozatuz.

V+ pasabidea eskalatu ondoren.


Bilgunera zoriontsu iritsi nintzen eta, egia esan, luzea motz egin zitzaidan, jejeje.

V+ pasabidearen gainetik bilgunera egindako argazkia.


- Laugarren luzea, 45 metro, V. Luze honetan Antxonek egindako aldaketak bi dira, lehenengoa luzearen hasieran, bigarrena aldiz, luzearen amaieran. Gure uste apalean bi aldaketa hauek zuzenago eskalatzeko aukera ematen dute, luzea asko hobetuz.

Bilgunetik ateratzen. Lehen ezkerrerago atera behar izaten zen.


Lehenengo aldaketa luzearen lehen 10 metroetan dago. Luzea orain arte bilgunearen ezkerretik hasi eta gainean dagoen hormatxora zeharka hurbiltzen zen. Antxonek irekitako bariantean luzeak bilgunetik gora zuzen doa, hormatxora zuzen iritsiz (IV). Ez nahasteko, ibilbide zaharreko paraboltak kendu egin ditu.

Puntu zuriekin luzeak jarraitzen zuen ibilbide zaharra adierazi dut.


Asierrek segurtasun handiz eskalatzen zuen bitartean, goxotasun sentsazio batean murgilduta, gorputz eta arima berotzen zidan eguzkiaz gozatzen hasi nintzen. Asier begi bistatik galdu nuenean parean nuen barraskilo bati adi-adi begira gelditu nintzen. Sokak segurtagailutik ihes egiten zuen heinean animali txiki honen kezkak zeintzuk izango diren pentsatzen aritu nintzen. Kezkarik izango du?

Kezkarik izango du?


Luzearen bigarren bariantea V zailtasuneko pasabidea eskalatu ondoren dagoen erlaitzaren gainean dago. Lehen, erlaitzean 6 metro inguru eskuinera jo behar zen diedro moduko bat eskalatzeko. Orain, Antxonek parabolt bat jarri du, erlaitzaren gainetik eskalatzen jarraitzeko.

Jarritako parabolt berria erlaitzetik ikusita.


Goiko argazkia egindako leku beretik behera egindako argazkia. Ikusten diren paraboltak luzearen V zailtasuneko pasabidekoak dira.


Bariantearen lehen 2-3 metroetan helduleku oneko harkaitz-plaka bertikal bat eskalatzen da (IV+). Metro bertikal hauen ondoren plakak bertikaltasuna galdu eta, arrail eder bat eskalatuz, metroak arinago irabazten dira bosgarren bilgunearekin topo egin arte (IV).

Bosgarren bilgunean. Argazkian bilgunea eta lehen metroak babesten dituen iltze bakarra ikusi daitezke.


Bariantea oso ona iruditu zitzaigun, primerako harkaitza eta ibilbide logikoena jarraitzen duena.

- Bosgarren luzea, 8 metro, III. Luze motz honek misterio handirik ez dauka eta gakoa bilgunearen gaineko arrail bertikala eskalatzean dago. Arraila eskalatuta, honen atzeko harkaitz baten ingurutik soka pasatu eta Asier aseguratu nuen.

Arrailaren gainetik egindako argazkia.


- Hobe deu soka bildu ta tarte hau oinez ittea - proposatu nion Asierri nire ondora iritsi zenean.

Bitan pentsatu gabe bakoitzak sokaren erdia bildu eta, oinez, azken luzea hasten den hormara hurbildu ginen.

- Seigarren luzea, 30 metro, IV+. "Birra Moretti" lehen aldiz eskalatu genuenean, Antxonek luzea horma goitik behera bitan banatzen duen ur-tantadun plaka goraino ireki ez izanak harritu gintuen. Honen ordez, luzea ezkerrera arrail inklinatu batetik bota eta ur-tantadun plakatxo batetik eraman zuen.

Orain irekitako bariantean, ur-tantadun plaka nabarmena goraino eskalatu ondoren, ezkerrera zeharkaldi bat egiten da luze originalarekin bat egiteko.

Argazki honetan azken luzea ikusi daiteke. Gorriz, irteera originala, zuriz aldiz, orain irekitako bariantea.


- Ea azkeneko hau zemuzkoa den - esan zidan Asierrek bilgunea utzi aurretik.

Bariantea hasten den lekura arte metroak erraz eskalatu zituen. Luze originala eta bariantea banatzen diren lekuan jarritako paraboltean aseguratu ondoren gora begira gelditu zen.

Paraboltetik gora begira...


- Gorrotxategik bidek nola ekipatzeittun kontutan eukita hurrengo parabolta urruti daula esango nuke.
- Ta ezkerralden eztau ezer? - galdetu nion.

Asier batera eta bestera begiratu arren, ez zuen asegururik topatu.

- Zuzen jarraittu beharkoet ba - bota zidan azkenik.

Ur-tantadun plaka zaila ez bada ere, oraindik eskalatzaile gutxik eskalatu izanagatik, Asier heldulekuren bat apurtu eta erortzeaz beldur zen. Kontu handiarekin eskalatuz, bi parabolten arteko distantzia murrizten joan zen, urrun zegoen parabolta eskura izan zuen arte (IV+).

Urrun zegoen paraboltaren ondoan.


- Oain ezkerreta trabesi bat iñez dijo - esan zidan paraboltetik - beste luzekin elkartzeko.

Poliki-poliki, mugimenduak ongi neurtuz, Asierrek zeharkaldia egin zuen (IV+). Zeharkaldia amaituta, luze originalarekin bat egin eta, bertatik jarraituz, azken bilgunera iritsi zen.

Azken bilgunetik behera egindako argazkia. Puntu zuriz, azken luzera arte oinez bete beharreko bidea.


Azken luzeko bariantea asko gustatu zitzaigun baina luze originalak ere bere xarma dauka. Zailtasunari dagokionez, biak paretsu izanda, zalantzak ditugu bariante originala berria baino hobea ez ote den.

Bidea amaitu bezain pronto, ahal izan genuen azkarren traste guztiak jaso eta, argazki bat egin ondoren, beherako bidea hartu genuen.

Bidea eskalatu ondorengo argazkia.


Antxonek bidea nola berritu duen izugarri gustatu zaigu. Bideak lehen zuenak baino ibilbide zuzenagoa jarraitzeaz aparte, orain gehiago eskalatzen da, eta luze guztietan zertxobait estutu beharreko pasabide bat topatuko dugu. Bide gomendagarria, inongo zalantzarik gabe!!!

Eguberri, urteberri, eskalada berri eta mendi berri on guztioi!!!!!

RAPPEL LERROA ARBARAN EKIALDEKO HORMAN: HARROBIA ZEHARKATZEAREN AMAIERA?

Urteetan Ziordiako eskaladarik errepikatuena ezproia izan zen. Honen ondoan irekitako “Beutiful Luis” (250 m, 6b) eta “Zazpika” (200 m, 7c+), bideek ez zuten errepikapenetan eragin handirik izan, biak ala biak maila handiko eskalatzailea izatea eskatzen dutelako, jejeje.

Arbara ekialdean eskalada biderik ez zegoen. Antxon Gorrotxategik begirada eta imajinazioa bertara zuzendu zuen arte. 2015 eta 2018 urteen artean, bera tartean zegoela, “Irati” (220 m, 5a), “Birra Moretti” (210 m, 5c), “Rock Circus” (240 m, 5c+), “Marieta” (210 m, 5c) eta “Altzania” (235 m, V) bideak iritsi ziren.

Horma horretan bide gehiago irekitzerik uste ez genuenean Club Vasco de Camping-eko Rafa Elorza eta Sergio Martinek 2018-2019ko neguan “Pop Circus” (200 m, 6a+) bidea ireki berri dute eta momentu honetan “Sopa de perejil” proiektu berriarekin lanean ari dira, “Rock Circus” eta “Pop Circus” bideen eskuinetik joango dena.

Irekiera hauen guztien ondorioz, azkeneko lau urte hauetan Arbara ekialdean eskalatzaileen kopuruak gora egin du. Baina gorakada honek lanegunetan alde txarra ere izan du, oinezko jaitsiera harrobiaren erditik doanez, harrobiko langileekin eztabaida eta liskarrak sortu direlako. Hau dela eta, eskalada-bide hauetako kroniketan hemengo eskalada harrobia itxita dagoenerako mugatzea gomendatu izan da, harrobiko langileak lanean lasai utzi eta egiten diren leherketen arriskutik kanpo egoteko.

Arbara ekialdeko hormatik behera jaisteko rappel lerro bat muntatua egotea egokia izango zela pentsatu eta esaten genuenok asko ginen, baina, esaerak dion moduan, “esana da erraz eta egina garratz”. Eta urteetan honela izan da Rafa Elorza eta Sergio Martin esanetatik eginetara pasa ziren arte.

“Pop Circus” bidea irekitzearekin batera, Rafa eta Sergiok Arbara ekialdeko hormatik behera jaisteko rappel lerro bat muntatu dute. Eta hau gutxi ez bada, 60 edo 35 metroetako rappelak egiteko aukera dago. Rafak kudeatzen duen “viejas zapatillas” webgunean kontatzen duen moduan (kronika irakurtzeko hemen klik egin dezakezu), rappel lerroa muntatu aurretik Antxon Gorrotxategi (bertan proiekturik bazuen jakiteko) eta Irurtzungo Biaizpen ekipatzaile sutsua den Joseba Arlegikin hitz egin ondoren, azkeneko honek rappelak ekipatzeko Nafarroako mendi federakuntzaren materiala utzi zieten.

Rappel puntu guztiak uztaidun bi paraboltez muntatuak daude.

RAPPELEN KROKISA

Gorriz lehen rappela eta 60 metroetakoak, urdinez aldiz, 35 metroetara egiten diren rappelak. Zuriz, eskubanda eta orlegiz “Rock Circus” bidea.


Lehenengo rappela ”Pop Circus” bidearen laugarren bilgunea da eta “Irati” eta “Rock Circus” bideen artean kokatuta dago, mugarri handi baten ondoan. Hau gutxi ez bada, nahasketarik ez izateko “Rápel” hitza eta gezi bat ere harkaitz batean idatzita utzi dute.

Lehen r.appela kokatutako mugarriaren ondoan. harkaitzean "rápel" hitza irakurri daiteke.


Lehen rappelaren hasieran.


Lehen rappela 30 metro ingurukoa da, soka finko batez egindako 15 metro inguruko eskubanda batera iritsi arte.

Eskubandaren hasierara hurbiltzen.


Eskubandaren amaieran bigarren rappel puntura iritsiko gara, hau ere “Rápel” hitza margotua duena.

Eskubandaren azken zatian, lehen rappela ikusi daiteke.


Rafak esan zidanez, “Rápel” hitza idaztea “Rock Circus” bidearen bosgarren bilgunearekin ez nahasteko egin zuten. Lehenengo rappela 50 metro ingurura luzatuz bigarren rappel puntura iristeko aukera badago ere, sokak jasotzerakoan nonbaiten katigatuta gelditzeko arriskua handia izan daiteke, batez ere udaberriaren amaieran, landara, sasi eta zuhaixkak puri-purian daudenean.

Bigarren rappel puntua.


Bigarren rappeletik beherako rappelak 35 edo 60 metroetakoak egin daitezke.

Bigarren rappelaren hasieran.


35 metroetako rappelak egitea erabakitzen badugu, hirugarren rappel puntua “Rock Circus” bidearen laugarren luzearen erdian (5c+ luzera iristeko egiten den II zailtasuneko zeharkaldi horizontalean) topatuko dugu. “Rock Circus”-eko luze hau eskalatzerakoan kontutan izan, laugarren luzearen “benetako” bilgunea 10-12 metro eskuinerako baitago.

Hirugarren rappelaren kokalekua, “Rock Circus” laugarren luzearen erdian gutxi gora behera.


35 metroetako laugarren rappel puntua “Rock Circus” eta “Pop Circus” bideen arteko erlaitz eroso batean dago. Puntu honetara 60 metroetako lehen rappelarekin iritsiko gara. 60 metroetako bigarren rappela eginez, puntu honetatik beheraino iritsiko gara.

Laugarren rappel puntuan (rappelak 60 metroetara egiten baditugu hau hirugarren rappel puntua izango da).


Laugarren rappel puntua.


Bigarren rappelean.


35 metroetako bosgarren rappel puntua “Rock Circus” bidearen bigarren luzearen amaieran eskalatzen den tximiniaren gainean eta eskuinean gelditzen da eta denetatik hau da rappel punturik “deserosoena”. Argi ibili behar da “Rock Circus”-en bigarren luzea eskalatzerakoan rappel puntu hau luzearen berezko bigarren bilgunearekin ez nahasteko.

Hirugarren rappelaren (60 metroetara eginda) hasieran.


Gutxi gora behera bosgarren rappel puntuaren parean.


Azken rappelean. Gutxi gora behera bosgarren rappel puntuaren parean nago.


35 metroetako azken rappelarekin “Rock Circus” bidearen ezkerreko kanaleraino iritsiko gara. Kanalean harri txiki solte asko dago eta lurrera ez erortzeko kontu handiz jaitsi beharko dugu. 10-12 metro eskas ibili ondoren “Rock Circus” bidearen oinera iritsiko gara.

Kanalera iristen, eskuinean “Rock Circus” bidearen oina ikusi daiteke.


Kanalean, gutxi gora behera ni nagoen lekuan 60 metroetako rappela amaituko litzateke.


Rappelak nahiko tenteak eta garbiak direnez, lehenengoa ezik, beste guztiak hobe 60 metroetakoak egiten baditugu, azkarrago jaisteaz aparte, sokak katigatzeko aukera txikia dagoelako. Guk horrela egin genuen eta ez genuen inongo arazorik izan, hori bai, 60 metroetako bigarren rappel-arekin (kanalera iristen garenarekin) lurrera juxtu-juxtu iritsiko gara.

Rappel lerro honek oinezko jaitsiera ia erdira murriztera lortu dezaken arren, jaiegunetan, kontutan izanda horman hainbat soka egon daitezkeela eta harrobia itxita dagoela, egokiagoa izan daiteke oinez jaisten jarraitzea, batez ere “Rock Circus” edo “Pop Circus” bideetan sokadarik badago, sokada hauek arriskuan ez jartzeko.

Amaitzeko, Rafa eta Sergiori eskerrak ematea besterik ez daukat Arbaran ekialdeko horman egindako lan bikainagatik. Bejondeizuela!!!!

ZIORDIA, ARBARA EKIALDEA: "BIRRA MORETTI" bidea, 210 metro, 5c (2015/12/20)

OHARRA: 2019 urtean Antxonek bidean hainbat aldaketa egin zituen. Bi luze berri ireki (lehenengoa eta bigarrena), kronika honetako bosgarren luzeari bariante pare bat egin eta azken luzeari ere bariante berri bat ireki zion. Aldaketa hauen guztien inguruko informazioa kronika honetan topatu dezakezue.

Ez dakit noizbait jarraian horrenbeste eskalatu dugun. Azkeneko urteotan udazkenaren erdialdean harkaitz eskaladarako materiala armairuan jaso eta neguko materiala prestatzen hasten ginen. Baina aurtengo udazken-negua oso arraro doa eta ezohiko eguraldi "beroak" harkaitz denboraldia abenduaren amaiera arte luzatzeko aukera ematen ari digu.

Larunbatean Ikerrekin Eginoko "Elmer" bidea manga motzetan (nork esango luke, eta gainera beroa pasatzen, jejeje) eskalatu ondoren, iganderako Asierrekin plan berri bat egin genuen: Antxon Gorrotxategi eta Garoa Unanuek Ziordian ireki berria duten "Birra Moretti" bidea eskalatzea. Ikerrek azken orduan etortzerik ezin zuela eta, Asier eta biok Ziordiara hurbildu ginen.

Birra Moretti italiar garagardo bat da. Oraindik gogoan daukat garagardo hau probatu genuen lehen aldia, Gran Paradiso mendira igo aurreko Vittorio Emmanuelle II aterpean izan zen. Hidratazioa ederki eraman genuen egun horretan, jejejeje.

Birra Moretti garagordoak Vittorio Emmanuelle II aterpean. A ze festa egun hortakoa!!!


Ziordian Antxon eta Garoak aurten ere ireki duten "Irati" bidea duela hilabete pare bat eskalatu genuen eta "Birra Moretti" antzerako bidea izango zenaren itxaropenaz Ziordiako harrobira iritsi ginen (harraobira nola hurbildu behar den hemen daukat azalduta). Gero ikusiko genuen moduan, bide hau ere itzela da, eskalatzea merezi duen horietakoa.

Hemendik Antxon Gorrotxategiri egunen batean Euskal Mendizale Federakuntzak nolabaiteko aitorpen, sari edo opariren bat egitea aldarrikatzen dut, hainbat luzeetako eskaladaren alde egiten ari den lanarengatik. Nire esku egongo balitz "Urrezko pioleta" ere emango nioke, jejeje. Tamalez, sari eta aitorpen gehienek aktibitate tekniko eta zailek eramaten dituzten bitartean, Antxonen moduan eskaladari ekarpen "praktikoago" bat egiten ari direnek ez dute gauza handirik jasoko. Gutxienez bideak ekipatu eta garbitzeko behar duen laguntza ematen badiote ez da gutxi.

BIDEAREN DATU BATZUK

Luzera: 210 metro.
Luzeak: 7.
Nork irekia: Antxon Gorrotxategi eta Garoa Unanue 2015eko azaroan.
Zailtasuna: 5c. Luzez-luze: 1ºL: 4b (45 m), 2ºL: II (35 m), 3ºL: 4c (20 m), 4ºL: 5c (35 m), 5ºL: 5a (45 m), 6ºL: III (5 m) eta 7ºL: 4c (30 m). Bidearen garbiketan lan itzela egin da, hala ere, ireki berria izanda, zenbait lekuetan harri eta harkaitz askeak daude. Errepikatzen den ehinean garbituz joango da.
Orientazioa: Ekialdea, hala ere udan bero handia pasa daiteke. Honegatik ura eramatea gomendatzen dut.
Hurbilketa: kotxea uzten den lekutik 15-20 minutu.
Jaitsiera: 2019tik horma rappelatu daiteke. Rappelen inguruko informazioa hemen irakurri dezakezue. Rappelik egin nahi ez bada, bidea amaitzen den lekutik ekialdera doa jaitsiera, puntu gorri eta mugarriz adierazitako bidea jarraituz. Ziordiako harrobia erditik zeharkatzen denez, bigarren aukera hau harrobia itxita dagoenean bakarrik jarraitzea komeni da, hau da, jaiegunetan, bertako langileei lanean lasai utzi eta egiten diren leherketek duten arriskuagatik. Bidea amaitzen den lekutik kotxera 45 minutu inguru pasako ditugu lasai ibiliz gero.
Eramandako materiala: 60 metroetako bi soka, luzera ezberdinetako 14 express zinta, zintak bilguneetarako, hainbat zinta bidea babesteko (guk ez genituen asko erabili bidean dauden harkaitz-zubi gehienak soka edota kordinoekin aseguratuak daude eta), Alien semaforoa (baita grisa ere), Camalotak 0,5-2 artean eta Limcam gorri eta horia, baina hala ere bide osoan bi lincam-ak bakarrik erabili genituen (bosgarren luzean). Walkie-talkie pare bat eramatea ere gomendagarria izan daiteke bilguneen artean oihuka ez aritzeko.
Bidea eskalatzeko pasatako denbora: 2h25'.

BIDEAREN KROKISA

Bidearen kokapena. Urdinez "Irati" bidea, eta honen ezkerrean Ziordiako ezproia.


Krokisa zehatzago.


BIDEAREN OINERA IRISTEKO

"Irati" bidearen hubilketarako jarraitutako bide bera jarraituko dugu, Birra Moretti bidea "Irati" bidetik 50 metro inguru eskuinerako dago eta. Bidearen hasiera kokatzeko hormaren erdian dagoen zuhaixka zabal bat erreferentzi ona izan daiteke, lehen luzea zuhaixka honen eskuinetik doa eta.

Pistatik lehenengo bost luzeak ikusi daitezke. Argazkian bidearen hasiera kokatzeko zuhaixka zein den adierazi dut.


Pista utzi genuen lekutik 0 bilgunera egin genuen bidea. Argazkian Ziordiako ezproia eta bidearen hasiera identifikatzeko zuhaixka ere ikusi daitezke.


DESKRIBAPENA

Larunbatean Eginon ikusi genuen kordada pila ikusita lehenago gelditu eta 8:30etarako Ziordiako harrobian geunden: "Bueno, gutxiñez ezteu iñor aurretio izango" esan zidan Asierrek kotxetik irten zenean. Eguzkiaren lehen izpiek oraindik horma gorritzen ari zirela, trasteak kotxetik hartu eta, erabat argitu gabe, poliki-poliki martxan jarri ginen.

Bilgunera iritsi eta, bidearen hasiera adierazten dun plakatxoaren ondoan, gainean genituen traste eta sokak lurrean utzi genituenean haize frexko batek agurtu gintuen: "gaur eztet uste atzoko beroa pasako deunik" esan nion Asierri. "Bai, gaur egune frexkogo dau".

Trasteak motxila eta arnesaren artean ditudan uztai guztietan zintzilikatu eta eskalatzen hasi nintzen.

Lehen luzea, 45 metro, 4b. Lehen luzea bidearen izena duen plakatxotik gora zuzen doa garbiketa lanen ondorioz horman egin den pasabide itsurakoa jarraituz. Eskaladari konfidantzaz heldu nion eta metroak erraz irabazten joan nintzen. Eskalatzen nuen ehinean nire ezkerrean bidea nondik doan identifikatzeko erabili genuen zuhaixka utzi nuen. Horma nahiz eta bertikalada izan, helduleku oso onak ditu eta denbora osoan eskaladatxoak eta atseden hartzeko erlaitz txikiak tartekatuz eskalatzen joan nintzen parabolt nahiz muntatutako harkaitz-zubietan express zintak pasatuz. Luzeko erlaitz txiki hauetako batean, luzea nondik jarraitzen zuen begira ari nintzela, Asierren marmarrak entzun nituen: "Ze?" Galdetu nion, "Argazki kamara, izorrau indela ustet" esan zidan. "Pena baina gutxiñez nerea daun bitarten" esan nion.

Eskaladak zertxobait ezkerrerako joera dauka eta horma amaitzen den lekutik 4-5 metro ingurura bilgunea ikusi nuen. Azken metro hauek erdi-oinez erdi-trepatzen eginez haritz baten enborratik pasatako bi soka eta maillona aprobetsatu nituen lehen bilgunea muntatzeko.

Horma amaitzen den lekutik 0 bilgunera egindako argazkia.


Lehenengo bilgunea.


Asier bilgunera iritsi zenean argazki kamararen egoeragatik kezkatu xamar zegoela nabaritu nuen. Kamara hartu eta ahal izan genuen guztia egin genion: bateria kendu, bateria jarri, txip-a kendu, txip-a jarri... Baina hala ere ez genuen martxan jartzerik lortu eta hemendik aurrera kamara bakarrarekin eskalatzen jarraitu genuen.

Bigarren luzea, 30 metro, II. Luzeari IIko zailtasuna ematen ziotela ikusita, "Reverso"tik sokak askatu eta Asierrek aske jarraitu zuen. Lehen bilguneko haritza bere eskuinetik inguratu eta, bertan dauden harkaitzen gainetik, ezkerrerako norabidean oinez jarraitu genuen.

Lehenengo bilgunetik atera ondoren.


Bigarren bilgunera iritsi aurretik 3-4 metroetako plakatxo erraz bat eskalatu (II) eta bigarren bilgunera iritsi zen. Bilgunearen aurretik dagoen plakatxoa nahiz eta tentea izan helduleku onak ditu eta oso erraz eskalatzen da.

Lehenengo bilgunetik egindako argazkian Asier bigarren bilgunean eta bilgunearen aurretik dagoen plakatxoa ikusi daitezke.


Bilgunea bi paraboltez osatua dago, bietako bat uztaiduna.

Bigarren bilgunea.


Bigarren bilgunetik lehenengora egindako argazkia eta bien artean jarraitu beharreko bidea.


"Buenooo, ustet hemendio gora komerik hasiko diela" esan nion Asierri gainetik genuena begiratuz. "Harritzen ditena da bidea eskubiko espoloien gañetik ez jutea. Gañea emateo hortio inda luze politte ateako zela" erantzun zidan. "Dudaik ez izan bidea hemendio badijo zerbaitegatio izangoela" esan nion.

Behera begiratu eta kordada bat bidean oinez zetorrela ikusi genuen: "honea badatoz, irixteako guk ia bukau deu" esan nion. Asierri material guztia pasatu eta aurretik genuen luzea 5c-ko luzea zelakoan eskalatzen hasi zen.

Hirugarren luzea, 20 metro, 4c. Hirugarren eta laugarren luzeek horman nabarmena den eta ezproiaren ezkerretik doan tximinia etzan itsurakoa jarraitzen dute.

Tximinian sartuta.


Tximini itsurako honek zailtasun handirik ez dauka, ongi babestua dago eta heldulekuak ederrak ditu, baina bilgunera hurbiltzen garen ehinean bertikalago jarri eta gogorragoa den pausu bat (4c) egin beharko dugu, baina pausu hau, bidean dauden pausu gogor guztien antzera, oso ongi aseguratua dago.

Asier hirugarren bilgunean.


Bilgunea ez da oso erosoa eta uztaidun parabolta eta iltze zahar batetik pasatako maillon-dun soka batez osatua dago.

Hirugarren bilgunea.


"Hau al da 5c-ko luzea?" Galdetu zidan Asierrek talkietik, "ez al da motzegi?". Gainean neraman krokisa begiratu eta luzea 4c eta 20 metroetakoa zela ikusi nuen. "Ostia, konfundittu naiz!!! Zuk indezun hau 4c-koa da" erantzun nion.

Hasieran zalantzan aritu ginen hirugarren eta laugarren luzeak batean egin ala ez. Azkenean, krokisean azaltzen den moduan, badaezpada bilgunea bertan muntatu genuen, "Elmer" bidea eskalatu genuenean lotu behar ez ziren bi luze lotzeagatik izan genituen komeriak buruan nituela.

Laugarren luzea, 35 metro, 5c. Gehiago eskaltzeko gogokin gelditu eta aurretik genuen luzea bidearen gogorrena zela ikusita, Asierri aurretik jarraitu nahi zuen galdetu nion: "Nahizuna" erantzun zidan aurpegi triste xamar batekin. Gainean neraman material eskasa hartu eta eman egin nion luzea eskalatzen hasteko.

Luzeak orain arte jarraitutako tximinia orain arteko zailtasuna mantenduz (IV eta IV+) amaierarte jarraitzen du. Tximiniaren amaieran, ezkerreko ertzan dagoen harlauza batera igo, eskuin hanka eskuinera diagonalean ireki eta pausu arraro bat egin genuen (V) luzeari zailtasuna ematen dion hormatxoaren azpira iritsiz.

Asier harlauzan igota.


Gertuago... Hemendik gora luze eta bidearen zailena hasten da.


Pausu hau ez da oso luzea (4-5 metro inguru) baina bai bertikala eta zertxobait atzera ere egiten duela esango nuke. Gainera pausuan dauden harkaitz eta heldulekuek ez dute konfidantza handirik ematen baina ederki eusten dute.

Luze eta bidearen pausurik gogorrenarekin borrokatzen.


Asierrek pausua eskalatzeko denbora hartu eta pazientziaz eskalatzen joan zen heldulekuei ahalik eta gutxien eutsiz. Pausua eskalatu zuenean behera begiratu eta behatzarekin dena ongi zihoanaren seinalea egin zidan.

Pausu gogorraren ondoren espoloiaren gainera igo eta bilguneraino plaka bertikal bat eskalatuko dugu. Plaka honen goiko ertzan eskuentzat heldulekurik onenak topatuko ditugu baina kontuz, kolokan dagoen harkaitz handi bat dago eta. Ezkerrera diagonalean eskalatuz uztaidun bi paraboltez osatutako bilgunera iritsiko gara (V).

"Luze hau eskalatu beharrekoa da, eh!!!" Ohartarazi zidan talkietik "gañea pasoko harrik eztie oso fidagarrik". "Asierrek hau esate bado ea zer topatzeten" pentsatu nuen nire burua "animatuz", jejeje.

Pausuaren azpira nahiko erraz iritsi nintzen eta bilgunetik ikusten dena baino bertikalagoa den sentsazioa izan nuen. Asierren esanetan fidagarriak ez ziren heldulekuak ikusi eta hasiera batean helduleku hauei eutsi gabe eskalatzen hasi nintzen. Pausua gogortzen hasi zenean "fidagarria ez den" helduleku hauetako bati ederki eutsi eta ongi eusten zuela ikusi nuen: "bigarren junda ta atzetik iñor etorribe, heldulekue askatzen bada ere eztiot iñorri miñik emango" pentsatu eta inguruko beste heldulekuetatik tiraka hasi nintzen pausua uste baino errazago gaindituz. Egia esan, nahiz eta fidagarri itsura ez izan heldulekuek ongi eusten dutela esango nuke.

Pausua gaindituta bilgunera arte egiten den zeharkaldiarekin hasi eta eskuak jartzen diren harkaitz handietako bat kolokan zegoela ikusi nuen. Hasieran zalantzan izan ginen horman behera bota edo ez, baina azkenean, harkaitzaren tamaina eta azpitik zetorren kordada non zegoen ez genekiela bertan uztea erabaki genuen.

"Harritatik heldu zea, eh?" Galdetu zidan Asierrek. "Ba bai, ta ederki gañea" erantzun nion "itsura eztue oso fidagarrie baña eztie bate moittu". Asierrek soberan zuen materiala jaso eta hurrengo luzea nondik doan ikusi ondoren bilgunetik atera nintzen.

R4 bilgunean.


Bosgarren luzea, 45 metro, 5a. Bilgunearen ezkerretik helduleku oneko plaka bertikal bat eskalatuz hasi nintzen erlaitz txiki batera arte.

Luzearen lehen metroetatik behera egindako argazkia.


Gorago... Erlaitz txikitik laugarren bilgunera egindako argazkia.


Erlaitz txiki honetan luzeak eskuinera hartzen du sabai baten azpira iritsi arte. Sabai hau ez da zuzen eskalatzen eta eskuinera erdi horizontalean pausu "arraro" bat egin beharko dugu. Pausu hau egiterakoan bi eskuak helduleku berean jarri behar izan nituen oreka ez galtzeko. Pausua egin ondoren eskuentzat helduleku txikiak dituen pausu bertikal bat eskalatu (5a) eta erlaitz batera iritsi nintzen.

Elaitz txikitik gora egindako argazkia, bertan luzearen pausurik zailenak eta aseguruak non dauden adierazi ditut.


Erlaitzean alde batera eta bestera begira aritu nintzen parabolt edo zintaren baten bila baina ez nuen ezer ikusten. Nire gainean nuen horman moztutako zuhaixka bat ikusi eta luzea gutxienez goraka zihoala baieztatu nuen, baina ez nuen inon asegururik ikusten: "krokisen nondik dijola esateo? Hemen eztet iñun txapaik ikusten" Galdetu nion Asierri. "Ba marrazkin arabera emateo zertxobait eskubira dijola" erantzun zidan. "Balee!!" erantzun nion. Erlaitzetik metro pare bat eskuinera egin eta gainean nuen haitzaren gailurrera doan diedro itsurako bat ikusi nuen. Eskuinerago zuhaixka batek bidea mozten zuela ikusita, bitan pentsatu gabe diedroa eskalatzen hasi nintzen: "Zuzen nijo ta bidea hemendio ez bada zerbait asmauko deu" esan nion Asierri. Diedro hau izan zen friend-ak erabili genituen leku bakarra (gure kasuan lincam gorri eta horia). Zailtasunaren aldetik IV inguruan ibiliko da.

Diedroa eskalatu nuenean, nire parean, 5-6 metro ingurura, bilgunea ikusi nuen.

Diedroaren amaieratik bilgunera egindako argazkia.


"Bilgunea paren dauket!!!!" Esan nion Asierri talkietik zoriontsu, "onaaa" erantzun zidan. Bilgunea uztaidun parabolt bat eta iltze zahar batez osatua dago. Bilgunea muntatzen ari nintzela inguruan ahots batzuk entzun eta atzetik zetorren kordada "Irati" bidea eskalatzen ari zela ikusi nuen: "eskerrak" pentsatu nuen "hola eztiegu gañea harrik botako".

Bilgunera iristen.


"Harritzen ditena da Gorrotxategin bidea izateko pasotik gora luzea nundik dijon ez markatzea" esan zidan Asierrek bilgunera iritsitakoan. "Bai, hasieran pixkat galduta ibili naiz goien moztutako zuhaixka ikusi deten arte" erantzun nion. "Dena den, beheko pasok ere bauke berea, eh?" Bota zidan Asierrek irrifar maltzur batekin.

Seigarren luzea, 5 metro, III. Bagenekien azken luzeko oinera iritsi arte tarte bat oinez egin beharko genuela, honegatik bilgunetik gora dagoen 5 metro inguruko horma bertikala bakarrik aseguratzea pentsatu genuen. Hala ere Asier bilgunetik gora zuzen atera eta hormatxoa "askean" eskalatu zuen.

Asier horma eskalatu ondoren. Argazkian ikusten denez, aseguruak jartzeko pitzadura eder bat dago.


Pausu hau ez da oso zaila baina bai bertikala, eta seguruak jartzeko aukera du. Sokak jaso eta pausua "modu klasikoan", hau da, soka bizkarretik pasatuz, aseguratu zidan.

Hormatik behera egindako argazkia.


Pausu hau eskalatuta eskuinean diagonalean (ipar ekialderko norabidean) ikusten den ur tantadun hormaren oinera iritsi arte oinez 25-30 metro inguru egin beharko genituela ikusita, sokak jaso gabe Asierrek aurrera jarraitu zuen luze bat egiten arituko balitz bezala. Hormaren oinera iritsi zenean sokak jaso zituen.

Horma eskalatu ondoren, R6 bilguneraino egin beharreko bidea.


Seigarren bilgunea harkaitz-zubi batetik pasatako soka batez osatua dago.

Asier R6 bilgunean eta zazpigarren luzearen zehaztasunak.


R6 bilgunean, harkaitz-zubitik pasatako soka ikusi daiteke.


Zazpigarren luzea, 25 metro, 4c. "Bueno, pastelari gindea jartzea" esan nion aseguratzen hasi nintzenean, "disfrutatu hau amaitzen data".

Azken luzearen ibilbidea bilgunetik ikusita.


Azken luzea gainean dugun ur-tantadun plaka nabaria eskalatuz hasten da.

Ur tantadun plakaren hasieran.


Ur tantadun plakaren amaieratik 3 metro ingurura bideak ezkerrera diagonalean doan arrail itsurakoa metro batzuetan jarraitzen du, bigarren ur tantadun plaka batera arte.

Arrailaren pasagunean bigarren ur tantadun plakaren hasieran.


Bigarren plaka hau, aurrekoa baino bertikal eta helduleku txikiagokoa, zuzen eskalatu beharko dugu. Luzearen amaieran horma bertikalagoa jartzen da (IV+) baina ez da zaila, helduleku oso onak ditu eta. Bilgunea hormatik atera ondoren harkaitz-zubi batetik pasatako kable eta zinta batzuez osatua dago.

Luzea eskalatu eta gero, azken bilgunetik zintzilik.


Gertuago...


"Ostras, luze politte bidea bukatzeko" esan nion. "Nei Hasiberriak-en ingenun azkenekon antzekoa iruittu zait" erantzun zidan. "Antzekoa bai, baña hau bertikalagoa dela esango nuke".

Azken bilgunean.


Elkarri bostekoa eman, txokolatezko barratxo bat jan eta lasaitasun handiz materiala jaso genuen. Argazki batzuk egin, etxera deitu bidea amaitu genuela esateko eta jaitsierako bidea hartu genuen.

Bion argazkia azken bilgunean.


Jaitsierako bidea "Irati" bidearen berbera da, eta orduan azaldu nuen moduan, harrobira arte margotutako puntu gorri eta mugarriz adierazita dago. Eskalada-bidea amaitzen den lekutik kotxea utzitako lekura gutxi gora behera 45 minutu pasa genituen presarik gabe eta argazkiak eginez jaitsita.

Kotxera iritsi ginenean beste kordadaren kotxearen matrikula iparraldekoa zela ikusi genuen: "joer, ta hauntzaño iritsi da bide hau iriki dela, eh?" Galdetu zuen Asierrek. "Bakizu, gaur egun internetekin informazioa mundu osora di-da baten zabaltzea". "Irati" bidearen seigarren luzean zeudela ikusi genuen. "Dena den, holako egualdikin bi kordada bakarrik etortzea harrittu nau" esan nion Asierri. "Ba bai. Jendea Pirineotara juten hasita izangoa".

Ziordiako hormei azken argazkiak egin, kotxean sartu eta etxerako bidea hartu genuen, gaur ere eskalada eder bat egin genuen sentsazioarekin.

Ziordiako hormei azken begirada, ekipatu edo ekipatu gabeko bide berri bat eskalatzeko ziur itzuliko garela.